香港,由漁村發展成國際城市;社會,由眾多不同文化族群構建;新鮮人,同義與初出茅廬相近,比喻缺乏經驗的人。
而我,原網名大雄,網誌自命為景三,今年離開校園,以新鮮人身份投身香港所謂的國際都會裡打工,吸取社會經驗。
此網誌記錄我人生經歷及分享個人日常趣事

2016年3月7日 星期一

過去半年,重新出發

首先睇呢篇文章之前,送首歌畀你聽住黎睇。
https://www.youtube.com/watch?v=itP4J3Bx9Wk

距離上一篇文章已經係半年前嘅事,有時候想將自己想法放係Facebook同大家分享,但奈何Facebook一大堆新嘅政策,例如放Youtube片會少左人睇,等等...情況已經令我係Facebook做任何事都開始要思前想後,會有卻步嘅諗法,所以依家放相都會寧願揀Instagram*,原因個平台夠濫,唔需要放一啲有資訊性既相都可以俾我廢UP一大論。當然,Instagram都有唔少本地User會放下旅遊資訊,而且幾齊全,做得仲好過正統旅遊網誌。

講開又講,我發現香港多左好多市集興起嘅潮流,由其是賣自家製品,呢類商店除左係Instagram愈黎愈多,更加走入其他大小市集,擴展佢地嘅業務,我係幾鍾意行市集,同時覺得呢類本地自家製品好有特色,真係希望各位香港人多啲留意下佢地,寧願花時間行一式一樣嘅商場,倒不如直接去本地市集睇下啲新奇玩意,約埋班朋友或者情侶去兜返轉,仲開心過去冒險樂園。

呢幅掛畫就係上年去市集買返黎,當時買個陣,老闆仲問我「點解你會買呢幅嘅,好少人買架咋,係我畫畫個partner死都話要畫呢幅黎賣」,我心諗,打機嘅野,你識條鐵咩?

另外講開街霸,其實我玩得唔勁,剩係識出下波動拳,仲好記得係Steam到同香港人連線對打嘅時候,打打下對面個玩家嬲到開MIC屌我,話「你真係唔識玩架喎,咪剩係用腳踢人啦屌你!」











另外今日決定左樣野,就係Fallout系列會搬去Twitch*平台繼續連載,呢個決定好艱辛,因為我又再次傷大家心。另外以後唔會再係自己Youtube頻道上面玩劇情類型嘅遊戲,其實唔係唔鍾意玩,而係我根本冇能力去應付故事嘅遊戲,我一直懷疑自己有係咪有閱讀障礙,睇字幕又慢過人,讀又讀得慢過人,要整呢類遊戲放上網俾人睇,好老實講我自己都唔會想睇,更何況我要整俾人睇。所以已經決定好左,未來目標都只係會玩「模擬」遊戲,例如模擬市民、模擬樂園、模擬乜乜乜。總之就係可以俾我發揮想像空間嘅遊戲,既然知道自己暫時做得最好就係呢類遊戲,我會放多啲時間係呢方面遊戲。

點解突然之間改變?係因為我想每次出片都係有內容性,我自己會滿意,我知道唔可以死守呢個範疇,要突破,所以同時之間我開始其他創作,會見多左我個樣出現係自己平台上面,希望頻道每次出片都做到有豐富嘅內容,而且絕對唔想馬虎,呢個就係我目標。

我亦都知道你地好討厭我懶嘅性格,或者呢頭講完出片,剩間又冇左件事,做野冇連貫性,真係好對唔住,我都覺得咁樣嘅創作要你地去支持會好辛苦,所以係創作同埋安排出片嘅時間,會逼自己要盡力去改。

呢幾日不停寫左啲新野,希望可以快啲拍到出黎俾大家睇,其實早係半年前已經好想拍有劇情性嘅Vlog*,但係我一直都釐定唔到拍出黎嘅究竟係叫Vlog定劇場片,因為Vlog本身個定義就係有畫面嘅生活片,或者係鏡頭前討論各種話題,不過暫定叫做Vlog,暫定...

最後,我會繼續係唔同平台做創作或者同你地交流,直到我死個一刻,多謝你地支持。

*註解
Instagram: 手機社交平台APP,以分享相片作為主嘅平台。
Twitch: 遊戲直播平台,遊戲唔再單純以拍片做形式,更加可以即時直播,同觀眾交流。
Vlog: 全稱為Video web log,由網上衍生出黎嘅新媒體,Vlog主要以影像代替從前網誌發放信息嘅新趨勢。

2015年8月9日 星期日

人生序章-若果打機,我叫「大雄」;若果打工,我叫「景三」。

兩個星期前,我係一位所謂嘅「YouTuber」,對我黎講,我唔配擁有,亦唔想擁有,因為名都係拎黎叫,實情我只係鍾意打機,鍾意用自己想像空間FF*俾人睇嘅後生仔。

上星期六,我終於展開人生第一份P.T工作。而我返工呢個地方係一間意大利餐廳,回想起當日見呢份工嘅時候亦約左位朋友一齊搵工,最後大家都睇中左呢間意大利餐廳。

呢份工點搵到,就要講返起見呢份工嘅前一間鋪頭,係一間賣衫嘅時裝店,當期時我見間鋪工作環境唔錯,人流亦唔差,所以想問佢地職員拎一份招聘表黎填,豈料要帶定張證件相黎先有得填表,所以打消念頭。一路上同位朋友經過間書店,原本我朋友想問間書店拎張入職表黎填,可惜收銀姐姐太有禮貌嘅關係,我朋友最後都冇哂興趣想見。

當我地已經走過間意大利餐廳嘅時候,我朋友話見到間餐廳有張招聘海報,老實講,我真係睇唔到,然而佢話俾我聽先知道,最後大家雙雙走入去填表,當位經理叫我入去鋪頭單獨面試時候,我成個人思緒狀態極之混亂,只好頂硬上,話哂係第一次,唔想輸俾自己睇。佢問我「明唔明工作需要做啲乜?」,我大致上講左一部份,佢亦明白,再問我「點解想返全職」,就如實答佢想體驗下個社會,吸取下經驗。依家諗返起,真係想恥笑自己,點解咁撚柒,咁快話俾人聽想做全職,咁後生唔讀書就想返全職。俾我講講先,當時個刻想返全職嘅原因,係想快啲搵到錢,唔想再咬住老媽子份辛苦糧,所以口快快寫左做全職。到最後經理話我聽等通知,同時即日收到電話下星期返工。

返工第一日,我工作位置係廚房水吧,而我朋友係侍應。埋位之後,有位同我差唔多後生嘅Part Time員工教我調配飲料,大家慢慢熟落有傾有講,廚房之間瀰漫住嘅話題不外乎係睇戲同打機,問我有冇玩LOL,我都笑笑口咁答冇玩好耐,有次經理仲問我咩排位*,我答佢銀牌,當時經理嘅眼神就好似當冇問過咁。突然間個廚房佬煮緊意粉,另轉頭同我講「潘森好撚勁呀!」,我答佢「好快改廢架啦」,佢竟然答我「改左都好撚屈呀!」...

由於我工作時間係中午至夜晚,去到中段冇咁多人嘅時候就係放飯嘅開始,而公司放飯嘅模式都係餐廳入面食,廚房負責埋員工膳食,福利唔差。食完飯,我就為自己沖左人生第一杯俾自己嘅凍檸茶,享受僅有嘅休息時間。



落開街食野嘅朋友都明白,去到夜晚,工作量大增,有陣時新仔關係,未完全熟識工作環境或者次序,我仲會俾位洗碟阿嬸鬧幾句「快啲拎走堆碗佢啦」。

有次收到張單,落嘅Older係叫「熱檸茶走檸」,當期時Load左十幾秒,究竟佢係要咩呢?原來真係檸檬茶走檸,落熱水加泡好嘅熱茶,就咁上枱,滿足唔同客人嘅「特別需要」。

做到夜晚,終於收工,可能第一日返工嘅關係,成個人都好攰,行動節奏慢一倍。即刻換返件衫,步入西鐵車箱中間,一路聽住「於是長大了以後」,一路搭車返屋企。

呢一晚,我話俾自己聽,出黎做野一定係辛苦,所謂「書到用時方力申」,真係到辛苦先黎怨已經太遲,但係唔緊要,當你睇緊呢篇野嘅各位同學仔,你地仲有時間...玩。

當你睇緊呢篇野嘅各位打工仔,屌你啦!聽日唔洗返工呀?訓啦!

其實...我都只係想講,共勉之。

點解我係呢個網誌棄用「大雄」呢個名,原因我想係社會展開我嘅「第二人生」。
用「景三」呢個網名,事源係我英文名叫Kingston,同音中文字為「景三」。

*註解:
FF*: 討論區術語,此字來源出自遊戲FINAL FANTASY簡稱,意思解作幻想。
排位: 遊戲裡的階級制度,身份象徵,排位愈高,代表實力愈強。(銅牌最低,鑽牌以上為高)